Ёғингарчилик кам, шамол кучсиз: Мутахассислар пойтахтдаги вазиятни изоҳлади

Тошкентда ҳаво сифатининг ёмонлашишига ёғингарчиликнинг камлиги, шамолнинг нисбатан кучсизлиги ва йирик чанг массаларининг кириб келиши сабаб бўлмоқда. 

Мутахассислар маълумотига кўра, ҳафта давомида Тошкентда нисбатан илиқ ва қуруқ об-ҳаво кузатилади. Кундузи ҳаво ҳарорати 18–20 даража, кечаси эса 8–10 даража атрофида бўлиши кутилмоқда. Бундай метеорологик шароитда 1 ноябргача атмосфера инверсияси юзага келиши мумкин.

Ёғингарчиликнинг камлиги, шамол тезлигининг пастлиги ва инверсия атмосфера ҳавосининг табиий тозаланиш жараёнини секинлаштириши мумкин. Шу сабабли 1 ноябргача Тошкентда чанг зарралари ва бошқа ифлослантирувчи моддалар миқдори ошиши ёки юқори даражада сақланиб қолиши эҳтимоли бор.

Ўзгидромет ҳаво сифатининг ҳақиқий ҳолати ва унинг ўзгариши ифлослантирувчи моддалар чиқиндилари ҳажми, шамол тезлиги ва йўналиши ҳамда бошқа метеорологик омилларга ҳам боғлиқлигини таъкидлади.

Маълумот учун: атмосфера инверсияси — ҳаво ҳарорати баландлик ортиши билан пасайиш ўрнига кўтариладиган метеорологик ҳодиса. Бунда ер юзасига яқин совуқ ҳаво қатлами устида илиқроқ ҳаво қатлами шаклланади. Натижада вертикал ҳаво алмашинуви чекланиб, чанг ва бошқа ифлослантирувчи моддалар атмосферанинг қуйи қатламида тўпланиши мумкин.