Жаримани вақтида тўламаган ҳайдовчилар: aвтомобиль жарима майдончасига жойлаштирилиши мумкин

Ўзбекистонда йўл ҳаракати қоидаларини бузганлик учун белгиланган жарима 60 кун ичида тўланмаса, ҳайдовчининг автомобили жарима майдончасига жойлаштирилиши мумкин. Янги тартиб 2027 йил 7 январдан кучга киради.

 

Бу ҳақда Ички ишлар вазирининг 4-сентабрдаги буйруғи билан тасдиқланган йўриқномада белгиланган. Ҳужжат 5 ноябрь куни Адлия вазирлигида давлат рўйхатидан ўтказилиб, 6 ноябрда расман эълон қилинган.

 

Йўриқномага кўра, жарима ҳақидаги қарор чиқарилган кундан бошлаб 60 кун ичида тўлов амалга оширилиши керак. Агар қарор устидан берилган шикоят ёки протест қаноатлантирилмаса, жаримани тўлаш учун бу ҳақда хабар берилган кундан бошлаб 30 кун муддат берилади.

 

Белгиланган муддатда жарима тўланмаган тақдирда, автомобиль ҳақидаги маълумотлар ЙҲХХ ходимларининг хизмат планшетлари ва бошқа ахборот тизимларида автоматик равишда акс этади. Шундан сўнг ходимлар маъмурий баённома тузмасдан, транспорт воситасини жарима майдончасига жойлаштириши мумкин.

 

Автомобиль жарима ҳақидаги қарор ижроси юзасидан иш юритиш якунлангунига қадар ушлаб турилади.

 

Бироқ ҳайдовчи жаримани электрон тўлов тизимлари, мобил иловалар ёки банк кассалари орқали жойида тўлиқ тўласа ва тўлов электрон тизимда тасдиқланса, автомобиль жарима майдончасига олиб кетилмайди. У ерга жойлаштирилган транспорт воситасини қайтариб олиш учун эса қарздорлик тўланиши ва электрон рухсатнома расмийлаштирилиши керак.

 

Шунингдек, амалдаги чегирма тартиби ҳам сақланиб қолади. Унга кўра, жарима ҳақидаги қарор топширилганидан кейин 15 кун ичида унинг 50 фоизини ёки 30 кун ичида 70 фоизини тўлаган шахс қолган суммани тўлашдан озод этилади. Бу имтиёз қонунчиликда белгиланган айрим ҳолатларга татбиқ этилмайди.