БАА Эрон активларини музлатиб қўйиши мумкинлиги ҳақида оғоҳлантирди
Бунга Эроннинг ракета ва дрон ҳужумлари сабаб бўлган.
БАА расмийлари ракета ва дрон ҳужумларига жавобан Эроннинг мамлакат ҳудудидаги активларини музлатиб қўйиши мумкинлиги ҳақида оғоҳлантирди. Бу ҳақда The Wall Street Journal нашри хабардор манбаларга таяниб хабар берди.
Маълумотларга кўра, Амирликлар расмийлари Теҳронни махфий тарзда эҳтимолий молиявий чоралар ҳақида огоҳлантирган. Улар орасида қобиқ компаниялар ҳисобларини музлатиш ҳамда валюта айирбошлаш шохобчаларини кенг кўламли текшириш каби чоралар муҳокама қилинмоқда.
Потенциал санкцияларнинг асосий нишонларидан бири Ислом инқилоби қўриқчилар корпуси (IRGC) билан боғлиқ молиявий тузилмалар бўлиши мумкин. Бундай чоралар Эроннинг ҳарбий дастурларини молиялаштириш билан боғлиқ каналларга жиддий зарба бериши эҳтимоли бор.
Мутахассислар таъкидлашича, ушбу чекловлар амалга оширилса, Эроннинг хорижий валюта ва глобал савдо тизимларига кириш имкониятлари кескин чекланиши мумкин. Чунки БАА узоқ йиллар давомида Ғарб санкцияларини четлаб ўтишда муҳим молиявий марказ сифатида хизмат қилиб келган.
Хусусан, Теҳрон глобал бозорларда нефть сотишдан тушган маблағларни Амирликлар инфратузилмаси орқали тақсимлаб келгани, шунингдек маҳаллий валюта айирбошлаш шахобчалари орқали расмий банк тизимларидан ташқари молиявий операциялар амалга оширгани қайд этилган.
