Бухоро ва Сурхондарёда қарийб 13 кг опий айланмаси тўхтатилди
Гиёҳвандлик моддаси Афғонистондан контрабанда йўли билан олиб кирилган.
Давлат хавфсизлик хизмати ҳамда божхона идоралари ҳамкорлигида ўтказилган тезкор тадбирларда гиёҳвандлик воситаларининг йирик партияси ноқонуний айланмадан чиқарилди. Бу ҳақда Zamon.uz'га ДХХ хабар берди.
Маълум қилинишича, Бухоро шаҳрида яшовчи, 1993 йилда туғилган ва муқаддам наркожиноят учун судланган шахс бошқарувидаги Chevrolet Lacetti автомашинаси “Сурхондарё–Бухоро” йўналишида ҳаракатланаётган вақтида Когон туманида тўхтатилган.
Автомашина кўздан кечирилганда, мотор қисмидаги ҳаво фильтри остига яширилган 993 грамм “опий” моддаси аниқланиб, процессуал тартибда расмийлаштириб олинган.
Суриштирувлар давомида гумонланувчи ушбу наркотик моддани Термиз туманида яшовчи, 1980 йилда туғилган ва халқаро юк ташиш билан шуғулланувчи шахсдан олгани маълум бўлган. Тезкор тадбирлар давом эттирилиб, мазкур шахс ҳам ушланган.
Унинг ёнидан 5 килограмм, яшаш манзилидан эса яна 7 килограмм “опий” гиёҳвандлик воситаси ашёвий далил сифатида олиб қўйилган. Тергов маълумотларига кўра, ушбу моддалар аввал Афғонистондан контрабанда йўли билан олиб кирилган бўлиши мумкин.
Ҳозирда ҳолат юзасидан жиноят иши қўзғатилиб, тергов ҳаракатлари олиб борилмоқда.
