Мен учун дўст ёки қариндош деган тушунча йўқ — Садир Жапаров

 

Қирғизистон Президенти Садир Жапаров Kaktus.media нашрига берган интервьюсида мамлакатдаги сиёсий жараёнлар, февраль ойидаги воқеалар, давлат тўнтаришига уриниш ҳақидаги иддаолар, хавфсизлик идоралари фаолияти, шунингдек собиқ Миллий хавфсизлик давлат қўмитаси (ГКНБ) раҳбари Қамчибек Ташиев ва унинг оиласи билан боғлиқ масалаларга изоҳ берди.

 

                 

 

Президент интервью давомида бир қатор саволларга жавоб бериб, давлат сиёсати, коррупцияга қарши кураш ва шахсий муносабатларнинг давлат бошқарувидаги ўрни ҳақида ўз позициясини билдирган.

 

Февраль ойидаги сиёсий жараёнлар ва “давлат тўнтаришига уриниш” ҳақидаги саволга жавоб берар экан, Садир Жапаров вазият бошидан назорат остида бўлганини таъкидлаган:

 

“Мен турли манбалардан маълумот оламан. ʼ75 кишилик хатʼ билан боғлиқ жараён бошланган пайтда ҳам менда етарли ахборот бор эди. Ҳужжатнинг парламентга кириб келишидан бошлаб ҳаракатларни кузатдим. Масала ялпи мажлисга чиқишидан олдин зарур чораларни кўрдик. Вазият бошидан назоратда эди”, — деди Жапаров.

 

                 

 

Унинг сўзларига кўра, хавфсизлик хизматлари жараёнларга жалб қилинган бўлсада, барча ҳаракатлар тўлиқ назорат остида бўлмаган ҳолатлар ҳам бўлиши мумкин.

 

Президент давлат раҳбари сифатида хавфсизлик идоралари фаолиятидан хабардор эканини билдириб, “Мен президент ва бош қўмондон сифатида асосий жараёнлардан хабардорман. Ким нима қилаётганини биламан. Лекин ҳамма нарса тўлиқ менинг назоратимда деб айта олмайман”, — дея таъкидлаган.

 

Шунингдек, истеъфога чиққан депутатлар масаласига тўхталиб: “Айрим сиёсий гуруҳлар парламентда муайян жараёнларни амалга оширмоқчи бўлган. Улар муваффақиятсизликка учрагач, айримлар ўз мандатларини топширган бўлиши мумкин. Якуний хулосани тергов беради”, — деди Жапаров.

 

                   

 

Ташиевга оид саволга жавоб берар экан, президент шахсий муносабатлар давлат сиёсатига таъсир қилмаслигини алоҳида таъкидлаган.

 

“Мен учун дўст, қариндош ёки яқин инсон деган тушунчалар давлат ишида йўқ. Давлат ва халқ манфаатлари биринчи ўринда”, — деди Жапаров.

 

Унинг сўзларига кўра, ҳар қандай иш бўйича якуний қарорни суд чиқаради: “Тергов бор, иш судга оширилади. Ким айбдор, ким айбсиз — буни фақат суд белгилайди.”

 

Шунингдек, Шаирбек Ташиев иши бўйича давлатга катта миқдорда зарар етказилгани аниқлангани ва зарар қоплангандан кейингина озодлик масаласи кўриб чиқилиши мумкинлиги қайд этилган.

 

Президент оила аъзоларининг давлат ишларига аралашмаслигини айтиб ўтган.

 

“Менинг оилам ва қариндошларим давлат бошқарувига аралашмайди. Биз аввалги хатоларни такрорламасликка қарор қилганмиз”, — дея таъкидлаган у.

 

                 

 

Ўғли ва қариндошлари инвесторлар билан мулоқотда бўлиши мумкинлигини, аммо давлат тузилмаларига алоқадор эмаслигини билдирган.

 

Шунингдек, олтин билан боғлиқ айбловларни рад этиб, “Бу 1000 фоиз ёлғон. Суратга тушиш ҳолати нотўғри талқин қилинган”, — дегaн Жапаров.

 

Казино қонуни бўйича танқидларга жавобан президент бу қарор иқтисодий мақсадларда қабул қилинганини айтган. “Бу қарор давлат манфаатидан келиб чиқиб қабул қилинган. Натижада бюджетга даромад тушмоқда, иш ўринлари яратилди”.

 

Шунингдек, Қирғизистон Президенти Россияга ташриф сиёсий босим билан боғланмаганини билдириб, “Мен ташаббус билан Москвага бордим. Музокараларда стратегик ҳамкорлик масалалари муҳокама қилинди”, — дея таъкидлаган Жапаров.