Қамчибек Ташиев давлат тўнтаришига уринишда айбланди

Қирғизистонда давлат тўнтаришига уриниш билан боғлиқ жиноят иши доирасида бир қатор собиқ юқори лавозимдаги шахслар сўроқ қилинди. Бу ҳақда адвокат Шердор Абдиқапаровга таяниб, 24.кг хабар берди.

 

Адвокатнинг билдиришича, Давлат миллий хавфсизлик қўмитасининг (ГКНБ) собиқ раиси Қамчибек Ташиев, собиқ депутат Курманкул Зулушев ҳамда Жогорку Кенешнинг собиқ раиси Нурланбек Шакиев Ички ишлар вазирлигига чақирилиб, сўроқ қилинган.

 

Маълум қилинишича, уларга нисбатан ушбу иш бўйича аввал бошқа гумондорларга қўлланилган айбловлар доирасида процессуал ҳаракатлар амалга оширилган. Айбловлар оммавий тартибсизликларни ташкил этиш ҳамда тергов томонидан давлат тўнтаришига уриниш сифатида баҳоланаётган ҳаракатлар билан боғлиқ.

 

Ҳуқуқни муҳофаза қилувчи органлардаги манбаларга кўра, сўроқлар ИИВнинг Бош тергов бошқармасида бир неча соат давом этган ва шундан сўнг собиқ амалдорлар идора биносини тарк этган.

 

Расмий идоралар ҳозирча айбловлар мазмуни ва тергов жараёнига оид батафсил маълумотларни ошкор этмаган. Бироқ манбаларга кўра, тергов “75 мактуби” деб аталувчи мурожаат билан боғлиқ.

 

Аввал хабар берилганидек, февраль ойида 75 нафар шахс Садир Жапаров ҳамда Жогорку Кенеш раҳбариятига мурожаат йўллаб, муддатидан олдин президент сайловларини ўтказишни таклиф қилган эди.

 

Ушбу воқеалардан кейин Камчибек Ташиев ГКНБ раиси ва Вазирлар кабинети раисининг ўринбосари лавозимларидан озод этилиб, ГКНБда қайта ташкил этиш ишлари амалга оширилди.

 

Хусусан, бир қатор юқори лавозимдаги амалдорлар ишдан олинди. Нурланбек Шакиев раисликдан кетиб, депутатлик мандатини топширди. Курманкул Зулушев ҳам депутатлик ваколатларидан воз кечди. Кейинчалик мазкур ҳолат юзасидан жиноят иши қўзғатилди.

 

Қайд этилишича, “75 мактуби”ни имзолаганларнинг бир қисми тергов ҳибсхонасига жойлаштирилган бўлиб, уларга оммавий тартибсизликларни ташкил этиш айби қўйилган.

 

Аввалроқ Қирғизистон Президенти Садир Жапаров Камчибек Ташиев ушбу мурожаат муаллифлари билан учрашганини рад этганини билдирган. Шу билан бирга, у Ташиев келгусида давлат лавозимларига тайинланмаслигини таъкидлаган.

 

Унинг укаси Шоирбек Ташиев ҳам депутатлик мандатини топшириб, коррупция иши бўйича сўроқ қилинган.