АҚШда Трамп сурати туширилган паспортлар чиқарилади
Янги дизайндаги паспортлар Қўшма Штатлар мустақиллигининг 250 йиллиги муносабати билан июль ойида тақдим этилади.
АҚШда Доналд Трамп тасвири туширилган чекланган миқдордаги юбилей паспортлар чиқарилади. Бу ҳақда Оқ уйга таяниб, BBC хабар берди.
Маълум қилинишича, янги дизайндаги паспортлар Қўшма Штатлар мустақиллигининг 250 йиллиги муносабати билан июль ойида тақдим этилади.
Расмийларга кўра, мазкур паспортлар тақдимоти бошлангач, паспорт олиш учун мурожаат қилган барча АҚШ фуқаролари учун мавжуд бўлади ва захира тугагунга қадар тарқатилади. Улар фақат Вашингтондаги махсус паспорт агентлиги орқали берилиши белгиланган.
АҚШ Давлат департаменти тақдим этган намунада президент сурати Мустақиллик декларацияси матни ва Америка байроғи фонида акс этган, шунингдек, унга олтин рангдаги имзо қўшилган.
Ҳозирги кунда АҚШ паспортларида мамлакат тарихига оид лавҳалар, жумладан ойга қўниш манзараси ҳамда Озодлик ҳайкали каби миллий рамзлар тасвирланган.
Шу билан бирга, фуқаролар ушбу махсус дизайндан воз кечиш имконига эга бўладими-йўқми — ҳозирча маълум эмас.
Бу ташаббус Трамп маъмурияти томонидан президент номи ва қиёфасини давлат дастурлари ҳамда жамоат объектлари билан боғлашга қаратилган сиёсатнинг давоми сифатида баҳоланмоқда.
Аввалроқ 2026 йил июндан бошлаб АҚШ қоғоз пулларида президент Доналд Трампнинг имзоси акс этиши ҳақида хабар берилганди.
Бундан ташқари, АҚШ Мустақиллик байрами муносабати билан Трампнинг стол атрофида муштини тугиб турган тасвири ва “Озодлик” ёзуви туширилган 24 каратли олтин танга чиқарилиши ҳам маълум қилинганди.
