Сергелида каналда оқиб кетаётган икки қизалоқни темирйўл ходими қутқариб қолди
Ходимга “Ўзбекистон темир йўллари” АЖ раҳбарияти томонидан ташаккурнома, эсдалик совғаси ҳамда пул мукофоти топширилди.
Тошкент шаҳрининг Сергели туманида канал оқимига тушиб қолган икки нафар қизалоқ темирйўл ходимининг тезкор ҳаракати туфайли қутқариб қолинди.
Маълум қилинишича, ҳодиса 9 июнь куни “Ўзбекистон темир йўллари” АЖнинг Тошкент минтақавий темир йўл узели филиали Тошкент темир йўл масофаси корхонасида фаолият юритувчи темир йўл созловчиси Аъзам Иброҳимов хизмат вазифасини бажараётган пайтда содир бўлган.
У Сергели тумани ҳудудидан оқиб ўтувчи Қорасув канали яқинида иш олиб бораётган вақтида сув оқимида оқиб кетаётган ва ёрдам сўраб чақираётган икки қизалоқни кўриб қолган. Шундан сўнг темирйўлчи зудлик билан каналга тушиб, кучли оқим таъсирида хавфли вазиятга тушиб қолган болаларни қутқариб қолган.
Қайд этилишича, Аъзам Иброҳимовнинг жасорати ва фидокорона ҳаракати “Ўзбекистон темир йўллари” АЖ раҳбарияти томонидан муносиб баҳоланиб, унга ташаккурнома, эсдалик совғаси ҳамда пул мукофоти топширилган.
