“Дўстлик” чегара постида валютани пойабзали ичига яширган шахс аниқланди
Бошқа бир йўловчи ҳам 771 минг рублини божхона назоратидан яширинча олиб чиқмоқчи бўлган.
Андижон вилоятидаги “Дўстлик” чегара божхона постида хорижий валютани божхона назоратидан яширинча олиб чиқишга уринган икки ҳолат фош этилди. Бу ҳақда Божхона қўмитаси Раисининг матбуот котиби хабар берди.
Божхона қўмитаси маълумотига кўра, йўловчилардан бири декларация қилган 8 минг АҚШ долларидан ташқари, яна 8 минг долларни пойабзали ичига яшириб олиб чиқишга уринган. Текширув давомида ушбу маблағлар аниқланиб, белгиланган тартибда расмийлаштирилган.
Шунингдек, яна бир йўловчи 771 минг Россия рублини божхона назоратидан яширинча олиб чиқишга уринган вақтида тўхтатиб қолинган.
Мазкур ҳолатлар юзасидан валюта маблағлари вақтинча сақловга олиниб, суриштирув ишлари олиб борилмоқда.
Эслатиб ўтамиз, амалдаги тартибга кўра, жисмоний шахслар Ўзбекистондан эквиваленти 100 миллион сўмгача бўлган нақд валюта маблағларини божхона қоидаларига риоя қилган ҳолда олиб чиқиши мумкин.
