Россияда “Толибон”ни танқид қилганлик учун биринчи марта жарима тайинланди
19 ёшли йигит томонидан қолдирилган изоҳ суд томонидан миллатлараро адоватни қўзғатиш сифатида баҳоланган.
Россиянинг Ростов-на-Дону шаҳридаги Октябрь туман суди “ВКонтакте” ижтимоий тармоғида “Толибон” ҳақидаги пост остида қолдирилган изоҳ сабабли маҳаллий фуқарога маъмурий жавобгарлик доирасида жарима тайинлади. Бу ҳақда Meduza хабар берди.
Қайд этилишича, 19 ёшли Эгор А. “ВКонтакте”даги пост остида нафрат қўзғатиш билан боғлиқ изоҳ қолдирган. Суд ҳужжатларида қайд этилишича, у Aero компаниясида ишлайди.
“ВКонтакте”даги постда “Толибон Россияни гранаталар, майиз, кока-кола, гиламлар ва пахта билан тўлдиради” деб ёзилган бўлиб, унинг остига Эгор А. “Ғорликларнинг Россияда нима иши бор?” мазмунида изоҳ ёзган. Изоҳ суд томонидан миллатлараро адоватни қўзғатиш сифатида баҳоланган.
Суд қарорида айбланувчининг яна мигрантларга оид икки изоҳи ҳам иш материалларига қўшилгани қайд этилган.
Қайд этилишича, Эгор А. ўз айбини тан олган ва пушаймонлигини билдирган. Суд унга 10 минг рубль миқдорида жарима тайинлаган.
Маълумот ўрнида “Толибон” 2021 йилда Афғонистонда ҳокимиятга келганидан сўнг Россияда террористик ташкилот сифатида тақиқланган эди. 2025 йил апрель ойида эса Россия Олий суди “Толибон”ни террористик ташкилотлар рўйхатидан чиқаришга қарор қилган.
