Ўзбекистон ва Жазоир сиёсий ҳамда иқтисодий ҳамкорликни кенгайтиришга келишиб олди

Ал-Жазоир шаҳрида Ўзбекистон делегацияси ҳамда Жазоир Халқ Демократик Республикаси ташқи ишлар вазири Аҳмад Аттаф бошчилигидаги делегация ўртасида музокаралар бўлиб ўтди. Бу ҳақда Ўзбекистон ташқи ишлар вазири маълум қилди. 

 

Қайд этилишича, тор ва кенг доирада ўтказилган учрашувларда Ўзбекистон ва Жазоир ўртасидаги сиёсий мулоқотни фаоллаштириш, савдо-иқтисодий ва инвестициявий ҳамкорликни кенгайтириш, шунингдек, маданий-гуманитар алоқаларни мустаҳкамлаш масалалари муҳокама қилинди.

 

 

Томонлар Жазоирнинг Африка қитъасидаги муҳим ва истиқболли шерик эканини қайд этиб, икки давлат ўртасида ҳали тўлиқ ишга солинмаган катта салоҳият мавжудлигини таъкидлади. Музокараларда тарихий дўстлик муносабатларини амалий шериклик билан бойитиш, олий ва юқори даражадаги мулоқотларни мунтазам йўлга қўйиш ҳамда қўшма лойиҳаларни кенгайтириш масалаларига алоҳида эътибор қаратилди.

 

Шунингдек, халқаро ташкилотлар доирасидаги ҳамкорлик, Қўшилмаслик ҳаракати, БМТ ва бошқа кўп томонлама платформаларда ўзаро қўллаб-қувватлаш масалалари юзасидан фикр алмашилди.

 

 

Минтақавий ва халқаро вазият ҳам муҳокама қилиниб, хусусан, Яқин Шарқдаги вазиятга алоҳида эътибор қаратилди. Томонлар барқарорликни таъминлаш ва кескинликни камайтиришда вазминлик, мулоқот ҳамда дипломатиянинг муҳим аҳамият касб этишини таъкидлади.

 

Музокаралар якунида икки томонлама ҳамкорликни ривожлантиришга қаратилган қатор ҳужжатлар имзоланди. Жумладан, Ўзбекистон Республикаси Ҳукумати билан Жазоир Халқ Демократик Республикаси Ҳукумати ўртасида дипломатик паспорт эгаларини виза талабларидан ўзаро озод қилиш тўғрисидаги Битим ҳамда Ўзбекистон Республикаси Ташқи ишлар вазирлиги ЖИДУ ҳузуридаги Дипломатик академия билан Жазоир Ташқи ишлар вазирлиги ҳузуридаги Дипломатик ва халқаро муносабатлар институти ўртасида Англашув меморандуми имзоланди.

 

 

Қайд этилишича, мазкур ҳужжатлар сиёсий мулоқотни фаоллаштириш, дипломатик алоқаларни кенгайтириш ва кадрлар тайёрлаш соҳасидаги ҳамкорликни мустаҳкамлаш учун ҳуқуқий асос яратади.

 

Шунингдек, делегация Жазоир Халқ Демократик Республикаси Президенти Абделмажид Таббоун томонидан қабул қилинди. Учрашув аввалида Ўзбекистон Республикаси Президенти Шавкат Мирзиёевнинг самимий саломи ва эзгу тилаклари етказилди.

 

Суҳбат давомида Ўзбекистон ва Жазоир ўртасидаги муносабатларни сифат жиҳатидан янги босқичга олиб чиқиш, сиёсий мулоқотни фаоллаштириш, савдо-иқтисодий ва инвестициявий ҳамкорликни кенгайтириш ҳамда маданий-гуманитар алоқаларни ривожлантириш истиқболлари муҳокама қилинди.

 

 

Бундан ташқари, минтақавий ва халқаро кун тартибидаги долзарб масалалар ҳамда халқаро ташкилотлар доирасидаги ҳамкорлик истиқболлари юзасидан фикр алмашилди.

 

Томонлар Ўзбекистон ва Жазоир ўртасидаги кўп қиррали ҳамкорликни янги мазмун билан бойитиш, мавжуд салоҳиятдан тўлиқ фойдаланиш ва аниқ амалий натижаларга эришиш бўйича ҳамкорликни давом эттиришга тайёр эканини билдирди.