Тошкентда Чирчиқ дарёси қирғоғининг бир қисми ўпирилди
Ҳодиса оқибатида яқин атрофдаги бино ва иншоотлар, бошқа объектлар ҳамда аҳоли хонадонларига зарар етмаган.
Тошкент шаҳрининг Бектемир туманида жойлашган Чирчиқ дарёси қирғоғида қисман ўпирилиш ҳолати юз берди. Бу ҳақда Тошкент шаҳар ҳокимлиги хабар берди.
Маълум қилинишича, ҳодиса 11 июнь куни соат 14:00 атрофида Бектемир тумани "Нурафшон" МФЙ ҳудудидан оқиб ўтувчи Чирчиқ дарёсининг сув иншооти (водопад) яқинидаги ўнг қирғоқ бетон қопламасида кузатилган.
Ҳодиса жойига Тошкент шаҳар ҳокимлиги, Тошкент шаҳар Фавқулодда вазиятлар бош бошқармаси ҳамда бошқа масъул хизматлар ходимлари етиб бориб, вазиятни бартараф этиш бўйича тезкор чораларни кўрмоқда.
Шунингдек, қирғоқни мустаҳкамлаш ишларини мувофиқлаштириш мақсадида идоралараро махсус штаб ташкил этилган.
Расмий маълумотга кўра, ҳодиса оқибатида яқин атрофдаги бино ва иншоотлар, бошқа объектлар ҳамда аҳоли хонадонларига зарар етмаган. Ҳозирда фуқаролар учун ҳеч қандай хавф мавжуд эмас.
Тошкент шаҳар ҳокимлиги ва масъул идоралар вазият тўлиқ назорат остида эканини маълум қилди.
