АҚШ ва Эрон шу ҳафта охиригача тинчлик битимини имзолаши мумкин — Трамп
Эроннинг Fars агентлиги ҳам Теҳрон битимни маъқуллаши эҳтимоли юқори эканини хабар қилди.
АҚШ президенти Доналд Трамп Қўшма Штатлар ва Эрон ўртасида тинчлик битими шу ҳафта охиридаёқ имзоланиши мумкинлигини маълум қилди. Бу ҳақда Reuters хабар берди.
Трампнинг таъкидлашича, келишув амалга ошса, Ҳормуз бўғози орқали халқаро денгиз қатнови қайта тикланади.
Оқ уйда журналистлар билан мулоқот қилган Трамп томонлар урушни якунлаш бўйича муҳим келишувга эришганини айтди. Президентнинг сўзларига кўра, ҳужжат яқин кунларда, эҳтимол ҳафта охирида имзоланиши мумкин.
Эроннинг Fars агентлиги ҳам Теҳрон битимни маъқуллаши эҳтимоли юқори эканини хабар қилди. Бироқ Эрон томони ҳозирча расмий жавоб бермаган.
Трампнинг билдиришича, келишувнинг асосий шарти Эроннинг ядровий қуролга эга бўлишига йўл қўймасликдан иборат. Шу билан бирга, Теҳрон халқаро санкцияларни бекор қилиш, музлатилган маблағларни қайтариш ҳамда Ҳормуз бўғози устидан назоратини тан олишни талаб қилмоқда.
Reuters манбаларига кўра, Эрон ва Ғарб вакиллари ўртасида ҳарбий ҳаракатларни тўхтатиш бўйича музокаралар сўнгги кунларда жадаллашган. Эронлик манбалар сиёсий келишувга эришилганини, аммо айрим масалалар юзасидан музокаралар давом этаётганини билдирган.
Трамп, шунингдек, ижтимоий тармоқдаги саҳифасида бўлажак битим Эрон раҳбариятининг юқори даражалари ҳамда Исроил, Саудия Арабистони, Қатар ва Бирлашган Араб Амирликлари томонидан қўллаб-қувватланаётганини таъкидлади.
Хабарлардан сўнг АҚШ фонд бозорлари ўсишни қайд этди, нефть нархлари эса пасайди.
Эслатиб ўтамиз, АҚШ ва Исроилнинг 28 февраль куни Эронга берган ҳаво зарбаларидан сўнг бошланган можаро уч ойдан буён давом этмоқда. Уруш оқибатида минглаб одамлар ҳалок бўлган, глобал энергия бозорларида эса кескин тебранишлар кузатилган.
