Андижондаги ёғоч омборида ёнғин чиқди
Андижон туманида содир бўлган ёнғин қарийб икки соат ичида бартараф этилди.
Андижон вилояти Андижон туманидаги ёғоч омборида ёнғин содир бўлди. Андижон ФВБ хабар берди.
Фавқулодда вазиятлар бошқармаси маълумотига кўра, 21 июнь куни соат 20:10 да 112 тизими орқали Андижон тумани Мард маҳалла фуқаролар йиғинида жойлашган ёғоч омборида ёнғин юз бергани ҳақида хабар келиб тушган.
Хабарга асосан ёнғин-қутқарув бўлинмалари воқеа жойига зудлик билан етиб бориб, ёнғинни бартараф этиш ишларига киришган. Ёнғинни ўчириш учун зарур куч ва воситалар сафарбар этилган.
Маълум қилинишича, ёнғин оқибатида тан жароҳати олганлар қайд этилмаган. Ёнғин соат 21:55 да тўлиқ ўчирилди. Ҳозирда ҳодиса жойида совитиш ишлари олиб борилмоқда.
