Тошкентда инсон ҳуқуқлари ва қамоқда сақлаш жойларини бошқариш бўйича уч кунлик халқаро тренинг ўтказилмоқда
Буюк Британия Метрополитен полицияси кўмагида қамоқда сақлаш жойларини бошқариш бўйича халқаро тажрибалар муҳокама қилинмоқда.
22 июнь куни пойтахтдаги Инсон ҳуқуқлари уйида “Инсон ҳуқуқлари соҳасидаги халқаро стандартлар ва қамоқда сақлаш жойларини бошқаришнинг илғор амалиёти” мавзусида уч кунлик халқаро тренинг ўз ишини бошлади.
Мазкур тадбир Инсон ҳуқуқлари бўйича Ўзбекистон Миллий маркази, ЙХҲТнинг Ўзбекистондаги лойиҳалари мувофиқлаштирувчиси ҳамда Ички ишлар вазирлигининг қўшма ҳамкорлик лойиҳаси доирасида, шунингдек 2025–2026 йилларга мўлжалланган ЙХҲТ лойиҳаларини амалга ошириш бўйича “Йўл харитаси” асосида ташкил этилмоқда. Тренинг жараёнига Буюк Британиянинг Метрополитен полицияси идораси ҳам амалий кўмак ва эксперт иштироки билан жалб этилган.
Тадбирнинг асосий мақсади — ҳуқуқни муҳофаза қилувчи органлар тизимида фаолият юритаётган ходимларнинг қамоқда сақлаш ва вақтинча ушлаб туриш жойларида инсон ҳуқуқларига риоя этиш, қийноқлар ва шафқатсиз муомалаларнинг олдини олиш ҳамда халқаро стандартларни амалиётга жорий этиш бўйича касбий салоҳиятини оширишдан иборат.
Тренингнинг очилиш маросимида Инсон ҳуқуқлари бўйича Ўзбекистон Республикаси Миллий маркази директори, академик Акмал Саидов, ЙХҲТнинг Ўзбекистондаги лойиҳалари мувофиқлаштирувчиси офисининг халқаро маслаҳатчиси Эндрю Юрковский, Ички ишлар вазирлиги ҳузуридаги Тергов департаменти бошлиғининг биринчи ўринбосари Мансур Сатторов, шунингдек БМТнинг Қийноқларнинг олдини олиш бўйича қуйи қўмитаси раиси ўринбосари, халқаро эксперт Элина Штайнарте иштирок этди.
Маърузачилар инсон ҳуқуқларини ҳимоя қилиш, қийноқларни олдини олиш ва қамоқда сақлаш тизимини инсонпарварлик тамойиллари асосида такомиллаштириш борасида халқаро ҳамкорликнинг аҳамиятини алоҳида таъкидладилар. Шунингдек, Ўзбекистонда сўнгги йилларда ушбу йўналишда амалга оширилаётган ислоҳотлар ижобий баҳоланди.
Тренинг давомида иштирокчилар қамоқда сақланаётган шахслар ҳуқуқларини ҳимоя қилишга доир халқаро-ҳуқуқий асослар, жумладан БМТнинг Қийноқларга қарши конвенцияси, унинг Факультатив протоколи ҳамда “Мандела қоидалари” билан батафсил таништирилмоқда.
Шунингдек, қамоқда сақлаш жойларида инсон ҳуқуқларини таъминлаш бўйича халқаро кафолатлар — адвокатга мурожаат қилиш ҳуқуқи, тиббий ёрдам олиш имконияти, оила аъзоларини хабардор қилиш тартиби, ушлаб туриш жараёнини тўлиқ ҳужжатлаштириш ва ҳисобдорлик механизмлари каби амалий жиҳатлар ҳам кўриб чиқилмоқда.
Буюк Британия Метрополитен полицияси вакиллари Филипп Майкл Эндрюс ва Жон Нортон Данторн томонидан қамоқда сақлаш ва вақтинча ушлаб туриш жараёнларини бошқариш бўйича илғор тажрибалар тақдим этилди. Улар тергов жараёнида инсон ҳуқуқларини таъминлаш, шаффофликни кучайтириш ҳамда ички назорат тизимларининг самарадорлиги юзасидан ўз тажрибалари билан ўртоқлашдилар.
Тренингнинг биринчи кунида иштирокчилар учун интерактив машғулотлар ташкил этилиб, қийноқлар ва шафқатсиз муомалаларнинг юзага келиш хавф омиллари, уларнинг олдини олиш механизмлари ҳамда амалий вазиятлар асосида таҳлиллар ўтказилди.
