ЖЧ-2026. Ўзбекистон иккинчи турда Португалияга ютқазди
Ўзбекистон гуруҳдаги сўнгги ўйинни 28 июнь куни Конго ДР миллий жамоасига қарши ўтказади.
2026 йилги Жаҳон чемпионатининг К гуруҳи 2-туридан ўрин олган Португалия ва Ўзбекистон терма жамоалари ўртасидаги учрашув якунланди.
Баҳс португалияликларнинг тезкор голи билан бошланди. Учрашувнинг 6-дақиқасида Криштиану Роналду ҳисобни очган бўлса, 17-дақиқада Нуну Мендеш жамоасининг устунлигини мустаҳкамлади. Биринчи бўлим якунланиши арафасида Роналду яна бир бор гол уриб, ҳисобни 3:0 кўринишига олиб келди.
Иккинчи бўлимда ҳам Португалия устунликни қўлдан бой бермади. 60-дақиқада Абдувоҳид Неъматов дарвозасига автогол қайд этилди. Учрашувнинг 88-дақиқасида эса Рафаэл Леау якуний нуқтани қўйди. Шу тариқа, Криштиану Роналду дубль қайд этган баҳсда Португалия Ўзбекистонни 5:0 ҳисобида мағлуб этди ва мусобақадаги илк ғалабасини қўлга киритди.
Ўзбекистон эса кетма-кет иккинчи мағлубиятини қабул қилиб олди. К гуруҳи 3-турида Ўзбекистон Конго ДРга, Португалия эса Колумбияга қарши майдонга тушади.
