Францияда жазирамадан сақланишга уринган 40 киши чўкиб ҳалок бўлди
Иссиқдан қочишга уринган фуқароларнинг назоратсиз сув ҳавзаларида чўмилгани фожиага сабаб бўлган.
Францияда давом этаётган кучли иссиқлик тўлқини оқибатида 18 июндан буён камида 40 киши чўкиб ҳалок бўлди. Бу ҳақда мамлакат бош вазири Себастен Лекорнюга таяниб, Al Arabiya хабар берди.
Қайд этилишича, жазирамадан салқинлашиш мақсадида кўплаб фуқаролар назорат қилинмайдиган дарё, канал ва бошқа сув ҳавзаларида чўмилишга уринган. Натижада бир неча кун ичида ўнлаб чўкиш ҳолатлари қайд этилган.
Франция метеорология хизмати мамлакатнинг катта қисмида юқори даражадаги иссиқлик хавфи эълон қилинганини билдириб, айрим ҳудудларда ҳаво ҳарорати 43 даражагача кўтарилиши мумкинлигини маълум қилди. Жазирама туфайли мамлакатда кундалик ҳаёт ҳам издан чиқмоқда.
Париж ва Брюссел ўртасидаги айрим поезд қатновлари бекор қилинган, корхоналар эса ходимларни иссиқдан ҳимоя қилиш чораларини кучайтирган. Айрим ҳудудларда электр вентиляторларига талаб кескин ошиб, дўконларда улар тугаб қолган.
Франциянинг жануби-шарқидаги Карпантра шаҳрида эса автомобиль ичида ҳушсиз ҳолда топилган икки нафар бола ҳаётдан кўз юмди. Маҳаллий прокуратура ҳодисани кучли иссиқлик билан боғлиқ фожиа сифатида баҳоламоқда. Жазирама Европанинг бошқа мамлакатларига ҳам таъсир кўрсатмоқда.
Италияда 15 шаҳар учун энг юқори даражадаги иссиқлик огоҳлантириши эълон қилинган. Буюк Британияда ҳаво ҳарорати 37 даражагача кўтарилиши кутилмоқда, Испаниянинг айрим ҳудудларида эса 44 даража иссиқ прогноз қилинмоқда.
