Ўзбекистоннинг 2 та қишлоғи Қирғизистонга берилди
Ўзбекистонга ҳам майдони жиҳатидан тенг бўлган ер участкалари топширилгани айтилмоқда.
Қирғизистон ва Ўзбекистон ўртасида давлат чегарасини демаркация қилиш жараёнлари доирасида Фарғона вилояти таркибида бўлган Чўнғара ва Тош-Тепа қишлоқлари Қирғизистон ҳудудига ўтди. Бу ҳақда Қирғизистон президенти матбуот котиби Асқат Алагозов маълум қилди, дея хабар бермоқда 24.кг.
Алагозовнинг сўзларига кўра, мазкур қишлоқларда яшовчи қарийб 2,5 минг нафар этник қирғиз эндиликда Қирғизистон фуқаролигини олади.
Маълум қилинишича, бунинг эвазига Қирғизистон томони Ўзбекистонга чегара ҳудудида майдони жиҳатидан тенг бўлган ер участкаларини топширган.
Шунингдек, Сой ва Таян қишлоқлари ўртасида автомобиль йўлини қуриш мақсадида умумий майдони 236 гектар бўлган тенг қийматдаги ер участкалари ҳам ўзаро алмашилган.
Янги йўл фойдаланишга топширилгач, Боткен вилояти аҳолиси Айдаркендан Боткенга 225 километрли айланма йўл ўрнига 55 километр масофани босиб ўтиб етиб бориши мумкин бўлади.
Маълумот учун, Қирғизистон ва Ўзбекистон давлат чегарасининг айрим участкалари бўйича шартнома икки мамлакат ташқи ишлар вазирлари томонидан 2022 йил ноябрь ойида имзоланган. 2023 йил январь ойида эса Ўзбекистон Президенти Шавкат Мирзиёевнинг Бишкекка давлат ташрифи чоғида томонлар ратификация ёрлиқларини ўзаро алмашган.
