Рим папаси Ливанда ҳалок бўлган мусулмон боланинг расмини ўзи билан олиб юришини айтди

Рим папаси Лео XIV Африкага амалга оширган сафари якунида самолёт бортида ўтказилган матбуот анжуманида Ливанда ҳалок бўлган мусулмон боланинг суратини ўзи билан олиб юришини маълум қилди. Бу ҳақда AP хабар берди.

 

Қайд этилишича, бола Исроил ва “Ҳизбуллоҳ” ўртасидаги сўнгги можаро чоғида ҳалок бўлган. У ўтган йили Лео XIV нинг Ливанга ташрифи чоғида папани кутиб олиш учун плакат кўтариб суратга тушган.

 

Шунингдек, понтифик АҚШ ва Эронни урушни тугатиш бўйича музокараларга қайтишга чақирди. Рим папаси можаро юзага келганда зўравонликка мурожаат қилиш ўрнига “тинчлик маданияти”ни шакллантириш зарурлигини таъкидлади. 

 

Унинг сўзларига кўра, асосий масала Эрон режимини ўзгартириш эмас, балки кўплаб бегуноҳ инсонлар қурбон бўлмасдан туриб умумий қадриятларни илгари суриш йўлларини топишдан иборат.

 

Сафар давомида Папа АҚШ президенти Доналд Трамп билан уруш масаласида юзага келган очиқ баҳслар фонида томонларни дипломатик мулоқотни тиклашга ундади.

 

Бундан ташқари, у давлатлар ўз чегараларини назорат қилиш ҳуқуқига эга эканини тан олган ҳолда, мигрантларга нисбатан инсоний муносабатни сақлаш зарурлигини қайд этди. 

 

Матбуот анжуманида Папа ўлим жазосига нисбатан кескин муносабат билдирди. У барча адолатсиз жазоларни қоралаб, инсон ҳаёти туғилишдан табиий ўлимгача ҳурмат қилиниши ва ҳимоя қилиниши лозимлигини таъкидлади.

 

“Ҳар қандай давлат ёки режим томонидан инсон ҳаётини ноҳақ олиб қўйишга олиб келадиган қарорлар қораланиши керак,” — деди у.