АҚШ ҳарбийси ўта махфий сирларни ошкор қилди
У Украинага ажратилган пулларнинг ўмарилиши, АҚШда ҳамон зарин гази борлигини ва Эроннинг янги олий раҳбарини йўқ қилиш кўриб чиқилаётганини айтди.
Пентагоннинг кимёвий ҳимоя бўйича юқори лавозимли мулозими Эндрю Ҳагг махфий маълумотларни ошкор қилганликда гумонланиб вақтинча хизматдан четлатилди. Бу ҳақда яширин тарзда суратга олинган видео эълон қилингач маълум бўлди.
Маълумотларга кўра, яширин видеолавҳада Эндрю Ҳагг танишув сайти орқали учрашган “қиз”га (журналистга) ўта махфий маълумотларни очиқлагани акс этган.
Ҳагг суҳбат давомида Украинага ажратилган маблағларнинг ўмарилиши, АҚШда ҳамон тақиқланган зарин гази захиралари мавжудлиги ва Мериленддаги лабораторияда хавфсизлик қоидалари бузилгани ҳақида сўзлаб берган. Мулозим ушбу газдан яқинда бир кимёгарнинг ҳалок бўлганини ҳам қўшимча қилган.
Шунингдек, у АҚШ ядро арсеналининг жойлашуви ва Вашингтоннинг Эронга нисбатан ядровий стратегиясига оид сирларни ҳам ошкор қилган.
Ҳагг Вашингтон Эрон Олий раҳбари Мужтабо Хоманаийни жисмонан йўқ қилиш имкониятларини кўриб чиқаётганини инкор этмаган. У агар Хоманаий ноўрин ҳаракатлар қилса нишонга олинишини билдриган.
Бундан ташқари, у Эроннинг Миноб шаҳридаги мактабга қилинган ҳужумда АҚШнинг бевосита иштироки борлигини тасдиқлаган.
“Урушда болалар доим ўлади” — деган Ҳагг.
Видео эълон қилинганидан сўнг Уруш вазири Пит Ҳегсет Эндрю Ҳаггнинг тизимдан четлатилганини маълум қилди. Эндрюга нисбатан давлат сирларини ошкор қилиш моддаси бўйича жиноий иш очилиши мумкин.
