Қирол Чарлз III АҚШга давлат ташрифи билан келди

Буюк Британия қироли Чарлз III ва қиролича Камила АҚШга тўрт кунлик давлат ташрифи билан етиб келди. 

 

Маълум қилинишича, мазкур давлат ташрифи Чарлз III ҳукмронлиги давридаги энг йирик ва муҳим ташрифлардан бири бўлиб, АҚШнинг Британия ҳукмронлигидан мустақиллик эълон қилганининг 250 йиллигига тўғри келади. Шунингдек, бу сўнгги 20 йил ичида британ монархининг АҚШга илк ташрифидир.

 

Ташриф АҚШ ва Британия ҳукуматлари ўртасида Эрон бўйича қарашлар турлича бўлиб турган пайтга тўғри келди.

 

Буюк Британия Қирол ва Қироличасини Оқ уйда АҚШ Президенти ва биринчи хоним Мелания Трамп кутиб олди. Томонлар қисқа расмий қисмдан сўнг ёпиқ чой суҳбатини ўтказди.

 

Кейинроқ Британия элчисининг қароргоҳида боғ зиёфати ташкил этилди. Унда сиёсатчилар, дипломатлар ва жамоатчилик вакиллари, жумладан сенатор Тед Круз ҳамда молия вазири Скотт Бессент иштирок этди.

 

Ташриф дастуридан Конгрессда нутқ сўзлаш, Оқ уйда давлат зиёфати ва Нью-Йорк шаҳригаа сафар ўрин олган. Қирол нутқида икки давлат ўртасидаги тарихий ҳамкорлик ва умумий демократик қадриятлар алоҳида таъкидланиши кутилмоқда.

 

Кузатувчиларга кўра, ташриф Буюк Британия бош вазири Кир Стармер ҳукумати учун ҳам муҳим дипломатик синов бўлиб, “махсус муносабатлар”ни тиклашга хизмат қилиши мумкин. Мазкур алоқалар Сувайш кризисидан бери энг паст даражага тушгани айтилмоқда.

 

Шу билан бирга, АҚШ ва Исроилнинг Эронга қарши ҳарбий ҳаракатлари юзасидан келишмовчиликлар сақланиб қолмоқда. Вашингтон Британиянинг бу борадаги позициясидан норози эканини билдирган.

 

Сафар якунида қироллик жуфтлиги Нью-Йоркда 11-сентабр воқеалари қурбонларини йод этади ҳамда Виржинияда экология йўналишидаги лойиҳалар билан танишади.

 

“Сўнгги кунларда Трамп Британияга нисбатан танқидларини бироз юмшатган бўлса-да, Пентагон ички хатида АҚШ Британиянинг Фолкленд оролига даъвосини қайта кўриб чиқиши мумкинлиги қайд этилган. Бу эса икки томонлама алоқаларни янада таранглаштириши мумкин”, дея ёзмоқда Reuters.

 

Хабарга кўра, ташриф давомида Чарлз III четлаб ўтишга ҳаракат қиладиган масалалардан бири — Жеффри Эпштейн можароси. Қиролнинг укаси собиқ шаҳзода Эндрю Эпштейн билан алоқалари сабаб обрўсидан айрилган ва терговга тортилган. Собиқ шаҳзода  барча айбловларни рад этган.