Жанубий Корея собиқ биринчи хоними 4 йилга қамалди
Аввалроқ суд томонидан Ким Гон Хи 20 ойлик қамоқ жазосига ҳукм қилинган эди.
Жанубий Корея апелляция суди собиқ биринчи хоним Ким Гон Хи иши юзасидан аввал чиқарилган ҳукмни қайта кўриб чиқиб, унга нисбатан тайинланган жазони кучайтирди. Эндиликда у тўрт йил муддатга озодликдан маҳрум этилди.
Аввалроқ суд томонидан Ким Гон Хи 20 ойлик қамоқ жазосига ҳукм қилинган эди. Янги қарорга мувофиқ, жазо муддати сезиларли даражада оширилган. Шунингдек, суд томонидан унга 50 миллион вон миқдорида жарима ҳам белгиланган.
Тергов материалларига кўра, собиқ биринчи хоним автомобиль савдоси билан шуғулланувчи компания акциялари нархларини манипуляция қилиш орқали ноқонуний даромад олганликда айбланган. Маълумотларда ушбу йўл билан 810 миллион вон миқдорида фойда кўрилгани қайд этилган.
Бундан ташқари, у сиёсий кампанияларни молиялаштириш қоидаларини бузиш билан боғлиқ айбловлар бўйича ҳам жавобгарликка тортилган.
Маълумот учун, унинг турмуш ўртоғи, Жанубий Кореянинг собиқ президенти Юн Сок Ёл ҳам аввалроқ беш йил муддатга озодликдан маҳрум этилган эди. Ҳозирда унга нисбатан яна бир неча суд жараёнлари давом этмоқда.
