Москвага қиш қайтди: ҳудудни қалин қор қоплади
Кучли қор ёғиши сабаб Москва ва вилоятда қарийб 200 та дарахт қулаб, автомобиллар ва электр тармоқларига зарар етган.
Москва ва Москва вилоятида кучли қор ёғиши ҳамда шамол туфайли мураккаб об-ҳаво шароити юзага келди. Бу ҳақда Meduza хабар берди.
Маълум қилинишича, 26 апрель кечидан бошлаб об-ҳаво кескин ёмонлашиб, душанба тонгига келиб ҳудудни қалин қор қоплади. Гидрометтсентр маълумотига кўра, Москвада бир кун ичида ойлик ёғингарчилик меъёрининг қарийб ярми ёққан. 27 апрель давомида яна 10 миллиметргача ёғингарчилик тушиши кутилмоқда, қор ёғиши кечга бориб янада кучайиши мумкин.
Ноқулай об-ҳаво сабаб Москва ва вилоятда қарийб 200 та дарахт қулаб автомобиллар ва электр тармоқларига зарар етказган. Айрим ҳудудларда электр таъминотида узилишлар кузатилган.
Транспорт тизимида ҳам жиддий узилишлар қайд этилди. Қулаган дарахтлар сабаб Москвада автобус йўналишлари ўзгартирилган. Москва метросининг айрим бекатлари оралиғида ҳаракат вақтинча тўхтатилган.
Шунингдек, Внуково аэропортида бир неча рейслар кечиктирилган, Москвага йўл олган поездлар эса 2,5 соатгача кечикиш билан ҳаракатланмоқда. Ҳудуд аҳолиси йўлларда кўплаб йўл-транспорт ҳодисалари юз бераётганини билдирган.
Аввалроқ, Москва ва вилоятда қор, музлама ва кучли шамол сабаб “тўқ сариқ” даражадаги об-ҳаво хавфи эълон қилингани маълум қилинганди.
