Бангладешда чақмоқ уриши оқибатида сўнги 24 соатда 14 киши ҳалок бўлди
Чақмоқ уришлари мамлакатнинг камида етти туманида қайд этилган.
Бангладешда сўнгги 24 соат ичида юз берган мавсумий чақмоқ уришлари оқибатида камида 14 киши ҳалок бўлди. Reuters хабарларига кўра, қурбонларнинг аксарияти очиқ далаларда қишлоқ хўжалиги ишлари билан банд бўлган фермерлар бўлиб, тўсатдан бошланган момақалдироқ вақтида дарахтлар остида бошпана топишга уринган.
Чақмоқ уришлари мамлакатнинг камида етти туманида қайд этилган. Фавқулодда вазиятлар хизматлари бир қатор ҳудудларда қидирув-қутқарув ва тиббий ёрдам ишларини олиб бормоқда. Жароҳат олган бир нечта фуқаролар яқин атрофдаги шифохоналарга етказилган, айримларининг аҳволи оғир экани билдирилмоқда.
Бангладешда ҳар йили чақмоқ уриши натижасида юзлаб инсонлар ҳаётдан кўз юмади. Мутахассислар ушбу ҳолатларни асосан муссон мавсумидан олдинги апрель–июнь ойларида кузатиладиган кучли иссиқлик, намлик ва беқарор об-ҳаво шароитлари билан боғламоқда. 2016 йилда мамлакат ҳукумати чақмоқ уришини расмий равишда табиий офат сифатида тан олган.
Экспертлар фикрича, ўрмонларнинг қисқариши ва баланд дарахтлар сонининг камайиши чақмоқдан табиий ҳимоя даражасини пасайтириб, инсонлар учун хавфни оширмоқда.
