Туркиядаги бокс турнири оммавий жанжал билан якунланди
Муштлашувда бир нечта россиялик спортчилар жароҳат олган.
Туркиянинг Трабзон шаҳрида ўтказилган бокс турнири якунида оммавий жанжал юз берди. Ҳодиса Universal Boxing Organization (UBO) йўналиши бўйича жаҳон чемпионлик камари учун кечган жангдан сўнг содир бўлган.
Мусобақада россиялик боксчи Сергей Горохов туркиялик Эмирҳан Калькан билан рингга кўтарилган. Жанг якунида ҳакам ғолиб номини эълон қилганидан сўнг вазият кескинлашиб, бир неча ўнлаб шахслар рингга чиқиб кетган.
Натижада спортчилар жамоалари, мураббийлар ва томошабинлар иштирокида оммавий муштлашув келиб чиққан. Дастлабки маълумотларга кўра, ҳодиса давомида россиялик спортчи жамоасининг бир неча аъзоси турли даражадаги тан жароҳатлари олган.
Манбаларга кўра, жабрланганлар тиббий ёрдам олиш учун шифохонага мурожаат қилган. Айрим маълумотларда жанжал россиялик боксчининг ғалабани ҳиссиёт билан нишонлагани ортидан бошланган бўлиши мумкинлиги қайд этилган.
