Владимир Путин Эрон ТИВ раҳбари Аббос Ароқчи билан учрашув ўтказди
Учрашувда Россия президентига Эрон олий раҳбари номидан махсус мурожаат етказилган.
Россия президенти Владимир Путин Санкт-Петербург шаҳрида Эрон ташқи ишлар вазири Аббос Ароқчини қабул қилди. Учрашув давомида Эрон олий раҳбари номидан махсус мурожаат етказилгани маълум қилинди.
Кремль матбуот хизмати хабарига кўра, томонлар Россия ва Эрон ўртасидаги икки томонлама ҳамкорлик, минтақадаги вазият ҳамда Яқин Шарқдаги кескинликни юмшатиш масалаларини муҳокама қилган.
Владимир Путин учрашувда Эрон халқига тинчлик ва барқарорлик тилакларини билдириб, Россия минтақада вазиятни дипломатик йўл билан ҳал этиш тарафдори эканини таъкидлади.
Аббос Ароқчи эса Теҳрон номидан Москванинг доимий қўллаб-қувватловига миннатдорлик билдириб, Россия ва Эрон ўртасидаги алоқалар стратегик шериклик руҳида ривожланаётганини қайд этди.
Томонлар минтақавий хавфсизлик, сиёсий мулоқотни давом эттириш ҳамда кескинликни камайтиришга қаратилган саъй-ҳаракатларни мувофиқлаштириш масалаларига алоҳида эътибор қаратди.
Мазкур учрашув Эрон ва АҚШ ўртасида кутилаётган навбатдаги музокаралар арафасида бўлиб ўтгани сабабли халқаро экспертлар эътиборини тортмоқда.
