Бойсунда дарёга нефтнинг оқиб кетгани табиатга 8,5 миллиард сўмдан ортиқ зарар етказди
23 апрель куни кучли ёғингарчиликлар оқибатида тахминан 1,2 тонна нефть маҳсулотлари аралаш суюқлик Хонгаронсойга оқиб кетган.
Сурхондарё вилоятининг Бойсун туманида нефть аралаш суюқликнинг дарёга оқиб кетиши билан боғлиқ ҳолат юзасидан 8,5 миллиард сўмдан ортиқ зарар ҳисобланди. Бу ҳақда Экология ва иқлим ўзгариши миллий қўмитаси маълум қилди.
Маълум қилинишича, ўрганишлар давомида “Surxan Gas Chemical Operating Company” МЧЖ қўшма корхонасига қарашли қудуқлардан бирида нефть маҳсулотлари аралаш суюқликнинг қайнаб чиқиш ҳолати аниқланган. Мазкур суюқликнинг табиий сув ҳавзаларига тушишининг олдини олиш мақсадида корхона томонидан “Eriell Oilfield Services Middle East DMCC” компаниясининг махсус техникалари жалб этилиб, 11 та ҳандақ қазилган.
Бироқ 23 апрель куни ҳудудда кузатилган кучли ёғингарчиликлар оқибатида тахминан 1,2 тонна нефть маҳсулотлари аралаш суюқлик Хонгаронсойга оқиб кетгани аниқланган.
Ҳолат юзасидан Ўзбекистон Республикаси Вазирлар Маҳкамасининг 2021 йил 12 апрелдаги 202-сон қарорига мувофиқ компенсация тўловлари ҳисоблаб чиқилган бўлиб, зарар миқдори 8,5 миллиард сўмдан ортиқни ташкил этган.
Ҳозирда юзага келган ҳолат бартараф этилгани, сув ҳавзаси нефть аралаш суюқликдан тозалангани билдирилмоқда.
Шунингдек, ўрганиш ишлари давом этмоқда. Жараён якунлангач, тўпланган материаллар ҳолатга ҳуқуқий баҳо бериш учун ҳуқуқни муҳофаза қилувчи органларга тақдим этилади.
