Тошкент ҳавоси нега ифлосланмоқда? Сабаблар лабораторияда ўрганилмоқда

Атмосфера ҳавосининг ифлосланиши, айниқса, куз-қиш мавсумида долзарб экологик муаммолардан бири ҳисобланади. Уни самарали ҳал қилиш учун ифлосланиш манбалари ва бунга таъсир қилувчи омилларни аниқлаш муҳим.

Шу мақсадда Президент фармони билан Экология ва иқлим ўзгариши миллий қўмитаси тасарруфида Ихтисослаштирилган атмосфера лабораторияси маркази ташкил этилган.

Марказ раҳбари, техника фанлари доктори Зикрилла Алимовнинг таъкидлашича, лабораторияда илғор халқаро тажриба ва замонавий ускуналар ёрдамида атмосферани ифлослантирувчи моддаларнинг келиб чиқиш манбалари ўрганилмоқда. Тадқиқотлар ҳаво ифлосланишига қайси омиллар кўпроқ таъсир қилаётганини аниқлашга хизмат қилади.

Айни пайтда Тошкент шаҳрининг барча туманларидан махсус фильтрлар ёрдамида ҳаво намуналари олиниб, лабораторияда таҳлил қилинмоқда. Жараёнда ифлослантирувчи моддаларнинг манбалари, уларнинг ҳаво сифатига таъсири ва метеорологик шароитлар билан боғлиқ жиҳатлар ўрганилмоқда. Келгусида ушбу тажрибани республика бўйлаб кенг жорий этиш режалаштирилган.

Мутахассислар ҳаво сифатига нафақат инсон фаолияти, балки об-ҳаво шароити ҳам таъсир қилишини қайд этмоқда. Масалан, узоқ вақт ёғингарчилик бўлмаслиги ҳаводаги чанг миқдорини ошириши мумкин. Ҳарорат инверсияси пайтида эса ерга яқин ҳаво қатламида ифлослантирувчи моддаларнинг тарқалиши чекланиб, уларнинг тўпланиши кучаяди.

Тадқиқотлардан кўзланган мақсад — ҳаво ифлосланишининг асосий сабабларини аниқлаш, унинг олдини олиш ва салбий таъсирини камайтиришга қаратилган илмий асосланган чораларни ишлаб чиқиш.