Тошкент кўчаларида чангни камайтириш чоралари: қарийб 100 та техника сув сепмоқда
Кўчаларни намлаш билан бирга, фавворалар ва суғориш тизимлари ҳам ишга туширилган.
Тошкент шаҳрида ҳаводаги чанг миқдорини камайтириш ва намликни ошириш мақсадида қарийб 100 та махсус техника ёрдамида кўчаларга сув сепилмоқда. Бу ҳақда шаҳар ҳокимлиги хабар берди.
Маълум қилинишича, йўл қопламаларини мунтазам намлаш чангнинг босилишига ва унинг ҳавога кўтарилишини камайтиришга ёрдам беради.
Шунингдек, шаҳарда фавворалар ва суғориш тизимлари ҳам ишга туширилмоқда. Бу чоралар кўчалардаги намликни ошириш, шаҳар микроиқлимини яхшилаш ҳамда аҳоли учун қулай муҳит яратишга қаратилган.
Ҳокимликка кўра, сув сепиш, суғориш ва фавворалар фаолияти биргаликда ҳаводаги чанг миқдорини камайтириш ва шаҳар муҳитини яхшилашга хизмат қилади.
