ОТМга имтиҳонсиз қабул: Президент Олимпиадаси ғолиблари учун янги имтиёз белгиланмоқда
Келаси йилдан совриндорларнинг пул мукофотлари 2,5 баравар оширилади.
Президент Олимпиадасида ғолиб бўлиб, Ўзбекистон рекордини янгилаган мактаб битирувчилари олий таълим муассасаларининг спорт йўналишларига имтиҳонсиз, давлат гранти асосида қабул қилинади. Бу ҳақда Президент Шавкат Мирзиёев 2026-йилги Президент Олимпиадасининг очилиш маросимида маълум қилди.
Шунингдек, келаси йилдан бошлаб олимпиада ғолиб ва совриндорларининг пул мукофотлари 2,5 баравар оширилади. Биринчи ўрин соҳибларига 25 миллион, иккинчи ўрин учун 12 миллион, учинчи ўрин учун эса 6 миллион сўм берилади.
Олимпиада дастуридаги спорт турлари сони 35 тага етказилади. Мусобақаларда қатнашувчи ёш тоифаси ҳам кенгайтирилиб, 14 ёшдан 17 ёшгача бўлган ўқувчилар иштирок этиши белгиланган.
Бундан ташқари, ҳар йили олимпиада ғолибларидан 50 нафари хориждаги халқаро ўқув-машғулот йиғинларига юборилади. Келаси йилдан ғолибларга бир йиллик стипендия бериш ҳам йўлга қўйилади. Ўз йўналишида энг яхши натижага эришган спорт мактаби зарур жиҳозлар билан таъминланади.
Шунингдек, пойтахтдаги Олимпия шон-шуҳрати музейини Олимпия шаҳарчасига кўчириш режалаштирилган. Бу ёш спортчиларнинг мамлакат чемпионлари тарихи ва ютуқлари билан яқиндан танишишига имкон беради.
Президент ёш спортчиларга мурожаат қилиб, чемпионликка эришишда кучли ирода ва темир интизом муҳимлигини таъкидлади. Уларни ўз устида ишлашга, билим ва қатъият орқали яратилаётган имкониятлардан самарали фойдаланишга чақирди.
“Мусобақа майдонида муносиб рақиб, ҳаётда эса яхши дўст бўлинг”, — деди давлат раҳбари.
Шундан сўнг Шавкат Мирзиёев 2026-йилги Президент Олимпиадасини очиқ деб эълон қилди.
