Робототехника бўйича жаҳон чемпионлари: Президент терма жамоа аъзоларини мукофотлади

Шавкат Мирзиёев Инчхонда ўтказилган “FIRST Global Challenge” халқаро робототехника мусобақасида жаҳон чемпиони бўлган Ўзбекистон терма жамоаси аъзолари ва мураббийларини мукофотлаш тўғрисидаги фармонни имзолади.

Фармонда қайд этилишича, қарийб 190 та мамлакатдан иқтидорли ёшлар иштирок этган мусобақада қўлга киритилган тарихий ғалаба Ўзбекистоннинг халқаро обрў-эътибори ва нуфузини оширишга муносиб ҳисса қўшган. Шунингдек, терма жамоа ёшларни илм-фан, илғор технологиялар, ихтиро ва инновацияларга жалб этиш, уларда Ватанга муҳаббат, садоқат ва миллий ғурур туйғуларини шакллантириш борасида намуна кўрсатгани таъкидланган.

Жумладан, робототехника бўйича Ўзбекистон терма жамоаси бош мураббийси Зиёдулла Бўтахонов “Содиқ хизматлари учун” медали билан мукофотланди.

Терма жамоа сардори Иброҳим Саломов, техник мураббий Абдуллоҳ Абдужабборов, шунингдек, жамоа аъзолари Шоҳрухбек Акбаров, Акбаршоҳ Қосимов, Аюбхон Мираҳмедов, Умарбек Пардаев, Шукрулло Содиқов, Маҳкамбек Тешабаев, Жасурбек Тожиқўзиев, Баҳодир Урманов ва Хондамир Урманов “Келажак бунёдкори” медали билан тақдирланди.

Шунингдек, терма жамоа менежерлари Сафина Тешабаева ва Ҳасанхон Юсупхўжаев ҳам “Келажак бунёдкори” медали билан мукофотланди.