Францияда ўқувчилар намойишлари: қарийб 8 минг киши ҳибсга олинди
Намойишлар вақтида полиция ходимлари, таълим соҳаси вакиллари ва ўқувчилар ҳам жароҳатланган.
Францияда таълим ислоҳотларига қарши норозилик намойишлари давомида 7 950 киши ҳибсга олинди. Уларнинг қарийб 80 фоизи вояга етмаганлар бўлган. Бу ҳақда BFMTV Франция Адлия вазирлиги маълумотларига таяниб хабар берди.
Сўнгги маълумотларга кўра, намойишчилар билан боғлиқ 2 700 та иш очилган. Улардан 2 200 таси бўйича огоҳлантириш, зарарни қоплаш мажбурияти ва айрим ҳудудларга боришни тақиқлаш каби чоралар қўлланган.
Франция бош вазири Себастян Лекорну 14 октябрь куни Сенатда сўзлаган нутқида намойишлар вақтида жароҳатланганлар сонини маълум қилди. Унинг айтишича, 937 нафар полиция ходими, 149 нафар таълим соҳаси вакили ва 248 нафар ўқувчи жароҳат олган.
Мактаб ўқувчилари ва талабалар иштирокидаги норозилик намойишлари сентябрь ойининг ўрталаридан буён давом этмоқда. Уларда ўқитувчилар, ота-оналар ва касаба уюшмалари вакиллари ҳам қатнашмоқда.
Франция Ички ишлар вазирлиги маълумотларига кўра, 13 октябрь куни мамлакат бўйлаб ўтказилган намойишларда 161 500 киши иштирок этган.
