Дронлар таҳдиди ва юзлаб бекор қилинган рейслар: Россия аэропортларида вазият қандай?
Октябрь ойининг дастлабки икки ҳафтасида Москванинг тўртта аэропортидаги чекловлар жами 101 соат давом этди.
Россияда Украина дронлари ҳужуми хавфи сабаб аэропортлар фаолиятидаги узилишлар кўпаймоқда. 16 октябрга ўтар кечаси Москванинг Шереметево, Внуково, Домодедово ва Жуковский аэропортлари рейсларни қабул қилиш ва жўнатишни вақтинча тўхтатган.
DW хабарларига кўра, айрим аэропортларда чекловлар бир неча соат давом этган. Натижада юзлаб рейслар кечиктирилган ёки бекор қилинган. Санкт-Петербургдаги Пулково аэропортида ҳам вақтинчалик чекловлар жорий этилиб, айрим йўловчилар рейсларини узоқ вақт кутишга мажбур бўлган.
Россия Федерал ҳаво транспорти агентлиги — Росавиация мамлакатнинг бошқа ҳудудларидаги аэропортларда ҳам хавфсизлик сабабли вақтинчалик чекловлар жорий этилганини билдирган. Улар орасида Пенза, Саратов, Уфа, Нижний Новгород, Қозон, Перм, Калининград, Самара ва Екатеринбург аэропортлари ҳам бор.
«Агентство» нашри ҳисоб-китобларига кўра, октябрь ойининг дастлабки икки ҳафтасида Москванинг тўртта аэропортидаги фаолият чекловлари жами 101 соатни ташкил этган. Сентябрь ойида бу кўрсаткич 46 соат бўлган.
14 октябрга ўтар кечаси Москванинг тўртта аэропорти бир вақтнинг ўзида тахминан етти соатга ёпилган. Бу ушбу турдаги узилишлар бўйича рекорд кўрсаткич сифатида қайд этилган.
Аэропортларнинг тез-тез ёпилиши Россияда ҳаво қатновининг барқарорлигини сақлаш масаласини кун тартибига олиб чиқмоқда. Чекловлар давомийлиги ва кўлами эса йўловчилар, авиакомпаниялар ҳамда аэропортлар фаолиятига таъсир кўрсатмоқда.
