105 марта қоида бузган Gentra хатлаб қўйилди
Ҳайдовчининг бундан ташқари яна 9 млн қарзи бўлган.
Маълум бўлишича, қарздор М.Э.дан “Капитал 24 чакана бизнес филиали” фойдасига 9 млн 964 минг сўм қарздорликни ундириш юзасидан ижро ҳужжати мавжуд.
Бундан ташқари, қарздорнинг МИБ иш юритувида 105 та тўланмаган маъмурий жарималари бўлиб, давлат ижрочиси томонидан қарздорга тегишли гаровдаги автотранспорт воситасига нисбатан қидирув эълон қилинган.
Кеча, 19 июль куни қарздорнинг яшаш хонадонига МИБ ходимлари борганда қарздор ва унинг яқин қариндошлари томонидан ижро ҳаракатларига қаршилик кўрсатиш, уйда бўла туриб дарвозани очмаслик ҳолатлари кузатилган.
Салкам 5 соат давом этган ижро ҳаракатлари натижасида тегишли ташкилотлар иштирокида автотранспорт воситаси уйда эканлиги аниқланиб, хатланган.
“МИБ томонидан қарздорга жарималарни 10 кун муддат ичида тўлаши, акс ҳолда хатланган мулк электрон аукцион савдосига чиқарилиши тўғрисида огоҳлантирилди ва ҳолат юзасидан тегишли ҳужжатлар расмийлаштирилди”, дейилади хабарда.
