АҚШ Лотин Америкасидаги гиёҳванд моддалар савдоси объектларига зарба беришни бошлайди
Трампнинг айтишича, наркокартелларнинг фаолияти ўтган йили 200 мингдан ортиқ инсоннинг ҳаётига зомин бўлган.
АҚШ президенти Доналд Трамп мамлакат гиёҳванд моддалар савдосига қарши курашни янада кучайтираётганини маълум қилди. Унинг айтишича, яқин вақт ичида АҚШ қуролли кучлари Лотин Америкасида жойлашган гиёҳванд моддалар савдосига алоқадор ер усти объектларига ҳам зарбалар беришни бошлайди.
Трампнинг таъкидлашича, наркотрафик туфайли ўтган йили 200 мингдан ортиқ инсон ҳалок бўлган. У АҚШ томонидан амалга оширилаётган ҳозирги чоралар натижасида бу кўрсаткич пасайганини қайд этди.
“Биз улар қаерда яшашини, қандай ҳаракат қилишини биламиз. Қуруқликдаги зарбаларни амалга ошириш анча осон. Тез кунларда бу амалиётни бошлаймиз”, — деди Трамп.
Давлат раҳбари, шунингдек, зарбалар фақат Венесуэла ҳудуди билан чекланмаслиги мумкинлигини билдирди. У Колумбияда кокаин ишлаб чиқарилиши ва унинг АҚШ бозорига етказиб берилиши ҳақидаги маълумотларга ҳам тўхталиб, бунга алоқадор шахсларга нисбатан қатъий чоралар кўрилишини таъкидлади.
