Financial Times нашри манбаларига таяниб хабар беришича, АҚШ расмий доиралари Ғазо сектори учун тузилган “Тинчлик кенгаши” моделини Украина ва Венесуэла билан боғлиқ можароларни ҳал этишга ҳам татбиқ этиш имкониятини муҳокама қилмоқда.
Нашр манбаларига кўра, мазкур ташаббус 19–23 январь кунлари Швейцариянинг Давос шаҳрида бўлиб ўтадиган Жаҳон иқтисодий форуми доирасида илгари сурилиши мумкин. Манбалардан бирининг таъкидлашича, АҚШ президент маъмурияти “Тинчлик кенгаши”ни келгусида можароларни ҳал қилишда БМТга муқобил бўлиши мумкин бўлган халқаро механизм сифатида кўриб чиқмоқда.
Араб дипломатларидан бири минтақа давлатлари мазкур кенгаш ваколатларини кенгайтириш масаласига эҳтиёткорлик билан ёндашаётганини билдирган. Ғарб дипломатлари ҳам ушбу ташаббус юзасидан хавотир билдиргани қайд этилган.
АҚШ билан музокараларда иштирок этган украиналик амалдорнинг айтишича, Доналд Трамп раҳбарлиги остида алоҳида “Тинчлик кенгаши”ни ташкил этиш Россия–Украина можаросини ҳал қилиш бўйича муҳокама қилинаётган вариантлардан бири ҳисобланади. Унинг сўзларига кўра, кенгаш таркибига Россия, Украина, Европа Иттифоқи ва НАТО вакиллари кириши мумкин ҳамда у 20 банддан иборат тинчлик келишувининг ижросини назорат қилади.
Маълумот учун, 16 январь куни АҚШ ҳукумати Ғазо бўйича “Тинчлик кенгаши” ташкил этилганини расман эълон қилган. Мазкур кенгашга Доналд Трамп раислик қилмоқда. Унинг таркибига АҚШ президент маъмурияти вакиллари, Буюк Британиянинг собиқ бош вазири Тони Блер ҳамда Жаҳон банки президенти Ажай Банга киритилган.
Эслатиб ўтамиз, аввалроқ Туркия президенти Ражаб Тоййип Эрдоған Ғазо масаласи бўйича тузилаётган "Тинчлик кенгашида" Туркия бўлмаса бу ҳеч қандай тинчлик кенгаши эмаслигини айтган эди.