АҚШнинг кейинги президенти ким бўлиши мумкин?

АҚШ Давлат котиби Марко Рубио мамлакатнинг амалдаги вице-президенти Жей Ди Венсни келгуси президентлик сайловларига номзод бўлиши мумкин бўлган энг кучли шахс сифатида тилга олди. Бу ҳақда у Fox News телеканалига берган интервьюсида маълум қилди.

 

“Менимча, агар у номзод бўлишга қарор қилса, Америка Қўшма Штатлари вице-президенти Жей Ди Венс кейинги Республика партиясидан номзод бўлади”, — деди Рубио. У, шунингдек, Венсни яхши дўсти деб атаб, унинг ишини юқори баҳолади. Давлат котибининг сўзларига кўра, Венс ҳозирги президентнинг жамоасида фаолият юритиб, Доналд Трампнинг сиёсий кун тартибини амалга оширишга хизмат қилмоқда.

 

Сўнгги ойларда J.D. Венснинг сиёсий келажаги кенг муҳокама қилинмоқда. Трумп 2025 йил август ойида уни  MAGA (Make America Great Again) ҳаракатининг “энг эҳтимолий вориси” деб атаган. Reuters ва Ntwsweek манбаларига кўра, айнан Венс ва Рубио Трампдан кейин Республикачилар партиясида асосий номзод сифатида кўрилмоқда.

 

Шунингдек, Венс илгари, агар Трампга нимадир бўлса, президентлик лавозимини эгаллашга тайёр эканини билдирган. Сиёсий шарҳловчилар фикрича, унинг вице-президентлик даври унинг тажрибасини ошириб, сайловчилар олдида обрўсини мустаҳкамлаши мумкин.

 

Рубио эса ҳозирча ўзини номзод сифатида кўрмаслигини, аммо Венсни “кучли ва истиқболли” сиёсатчи деб билишини айтмоқда. Шу тариқа, Республика партияси ичида 2028 йилги президентлик сайловларига оид дастлабки тахминлар аллақачон юзага келган.