Экология ва атроф-муҳитни муҳофаза қилиш бўйича масъул идоралар томонидан Тошкент шаҳри ва вилоятида ўтказилган уч кунлик кенг кўламли рейдлар якунлари бўйича расмий маълумот берилди.
Махсус комиссия топшириғига мувофиқ, 25–28 ноябрь кунлари Экологик назорат бўйича давлат инспекцияси (Экополиция) Бош прокуратура, Фавқулодда вазиятлар вазирлиги, Миллий гвардия ва ички ишлар органлари билан ҳамкорликда Қибрай, Зангиота, Янгийўл туманлари, шунингдек, Тошкент шаҳрининг бир қатор ҳудудларида атроф-муҳитга таъсир кўрсатувчи объектлар фаолиятини ўрганиш бўйича текширувлар ўтказди.
Текширувлар давомида жами 1 157 та объектнинг ҳаво сифатига оид экологик талабларга риоя қилиши ўрганилди. Рейдлар якунларига кўра қуйидаги натижалар қайд этилди:
- 464 та ҳуқуқбузарлик аниқланиб, уларга нисбатан 250 миллион сўмдан ортиқ жарима қўлланди;
- Атроф-муҳитга зарар етказгани аниқланган 59 та объектнинг фаолияти 10 иш кунига вақтинча тўхтатилди (шундан Тошкент вилоятида — 50 та, Тошкент шаҳрида — 9 та);
- 15 та иссиқхона ҳавога чиқарилаётган зарарли моддаларни камайтириш мақсадида фильтр ускуналари билан жиҳозланди.
Экополициянинг таъкидланишича, рейдлар давом этмоқда ва экологик меъёрларнинг бузилишига нисбатан назорат янада кучайтирилади. Атроф-муҳитга зарар етказувчи корхоналар фаолияти қатъий тартибда баҳоланиб, қонунбузилиш ҳолатларига нисбатан кескин чоралар кўрилади.