Айрим тоифадаги шифокорларга қўшимча устама ҳақи тўланади
Фалсафа доктори илмий даражасини олган ходимлар меҳнатга ҳақ тўлаш энг кам миқдорининг 15 бараварида устама олишади.
Соғлиқни сақлаш вазирининг тегишли буйруғи билан давлат тиббиёт муассасаларининг малакали шифокорларини рағбатлантириш йўлга қўйилди. Бу ҳақда вазирлик матбуот хизмати хабар берди.
Қайд этилишича, мазкур тизим халқаро рейтингларда тиббиёт йўналишида биринчи 200 таликка кирган олий ўқув юртларининг клиник ординатура (резидентура), магистратура мутахассислигини тамомлаган ва фалсафа доктори (PhD) ёки фан доктори (DSc) илмий даражасини олган тиббиёт ходимларига татбиқ этилади.
Номзодлар томонидан аризалар муассасанинг кадрлар бўлимига топширилади. Ҳужжатлар навбатдаги босқичда вазирликнинг Фан ва таълим бошқармаси томонидан кўриб чиқилгач, вазир буйруғи орқали рағбатлантирилади.
Номзодларнинг лавозим маошига ҳар ойлик қўшимча устама вазир буйруғи чиққан кундан бошлаб бир йил давомида меҳнатга ҳақ тўлаш энг кам миқдорининг қуйидаги бараварида белгиланади:
—клиник ординатура (резидентура), магистратура мутахассислигини тамомлаган тиббиёт ходимига – етти баравари;
—фалсафа доктори (PhD) ёки фан доктори (DSc) илмий даражасини олган тиббиёт ходимига – ўн беш баравари.
Эслатиб ўтамиз, аввалроқ тиббиёт олийгоҳи талабалари учун вазир стипендияси таъсис этилганди. Унинг миқдори Иби Сино номидаги давлат стипендияси миқдорига тенглаштирилган.
