“Барселона” антирекорд қайд этди
“Барселона” кеча Чемпионлар Лигасида “Виктория” устидан 4:2 ҳисобида ғалаба қозонганди.
Шу тариқа каталонияликлар гуруҳ босқичининг барча ўйинида ўз дарвозасидан тўп олиб чиқди. “Кўк-анорранглилар” жами 12 та гол — 5 та “Бавария”дан, 4 та “Интер”дан ва 3 та “Виктория”дан ўтказиб юборди.
ХХI асрда “Барселона” бирор марта гуруҳ босқичининг барча ўйинларида гол ўтказиб юбормаган эди. Эслатиб ўтамиз, 2003/04-йилги мавсумда жамоа Чемпионлар Лигасида иштирок этмаган.
Испания чемпионатида эса каталонияликлар ҳимояси анча ишончлироқ ҳаракат қилмоқда. Ортда қолган 12 турдан сўнг Хави шогирдлари 4 та гол ўтказиб юборди (3 таси “Реал”дан, яна бири “Реал Соседад”дан).
“Барселона” C гуруҳида 3-ўринни эгаллаб, ўз юришини Европа Лигасида давом эттирадиган бўлди.
