Боливияда ҳарбийлар президент саройига бостириб киришга уринди
Президент буни давлат тўнтаришига уриниш деб атади.
26 июн куни ҳарбийлар Боливия ҳукумати бинолари жойлашган Ла-Пасдаги Плаза Муриллога кириш йўлларини тўсиб қўйишди. Шундан сўнг танк сарой дарвозаларини бузиб киришга уринди. Зирҳли техника ва қўшинлар майдонда жойлаштирилди.
Ҳужумни бошқарган Боливия армияси генерали Хуан Хосе Сунига ҳарбийларнинг мақсади мамлакатда демократияни тиклаш эканлигини айтди ва сиёсий маҳбусларни қамоқдан озод қилишга ваъда берди.
"Қуролли кучлар Боливияда демократияни қайта қуриш, уни 30-40 йил давомида бир хил қарашдаги кишилар бошқариб келаётган тизимни эмас, ҳақиқий демократияга айлантириш тарафдори", — деди генерал Сунига президент саройи олдидаги нутқида.
Боливия президенти Луис Арсе ҳарбийлар президент қароргоҳи жойлашган Ла-Пасдаги “Буюк Халқлар уйи”га бостириб киришга урингач, мамлакат халқини давлат тўнтаришига уринишга қарши чиқишга чақирди.
"Боливия халқи демократия учун давлат тўнтаришига қарши бирлашиши ва сафарбарлик уюштириши зарур. Биз тўнтаришга уринишлар боливияликларнинг ҳаётига зомин бўлишига йўл қўя олмаймиз", — дея таъкидлади у мурожаатида.
Орадан кўп ўтмай президент мамлакатнинг янги ҳарбий раҳбарияти тайинланганини эълон қилди: Хосе Уилсон Санчес Боливия армиясининг янги қўмондони этиб тайинланди.
Оммавий ахборот воситаларининг хабар беришича, ҳарбийлар янги армия қўмондонининг буйруғига биноан пойтахтдаги президент саройи ва марказий майдонни тарк этишни бошлади.
Давлат тўнтаришига муваффақиятсиз уринишдан сўнг уч нафар ҳарбий раҳбар қўлга олинди. Улар орасида генерал Хуан Хосе Сунига, ҳарбий-ҳаво кучлари генерали Марсело Хавьер Сегарра ва вице-адмирал Хуан Арнес Салвадор Уларнинг барчаси полиция бўлимига олиб кетилган.
Боливия Мудофаа вазири Эдмундо Новиллонинг сўзларига кўра, ҳукумат давлат тўнтаришига уринишдан сўнг мамлакат қуролли кучлари устидан тўлиқ назоратни сақлаб турибди.
