Бухорода танишини пичоқлаган эркак 23 йилга қамалди
Суд томонидан унга нисбатан ҳукм чиқарилди.
Бухоро вилоятининг Когон шаҳрида ўзаро келишмовчилик оқибатида танишини пичоқлаб ўлдирган эркакка 23 йил муддатга озодликдан маҳрум қилиш жазоси тайинланди.
Қотиллик 2024 йилнинг 13 октябрь куни содир бўлганди. Судланувчи эркак келишмовчилик оқибатида танишлари Н.A. (аёл) ҳамда У.Д. (эркак)ни қасддан ўлдиришни мақсад қилиб, уларнинг танасининг турли соҳаларига ошхона пичоғи билан урган. Оқибатда У.Д. шаҳар тиббиёт бирлашмасида олган тан жароҳатлари билан вафот этган.
Жиноят ишлари бўйича Когон шаҳар судида ушбу қотиллик юзасидан суд иши якунланди.
Жиноят Кодексининг 59-моддасига (бир неча жиноят содир этганлик учун жазо тайинлаш) асосан эркакка нисбатан жазоларни қисман қўшиш йўли билан узил-кесил 23 йил озодликдан маҳрум қилиш жазоси тайинланган.
