АҚШ президенти Дональд Трампнинг Гренландияни Қўшма Штатлар таркибига қўшиш ҳақидаги баёнотларидан сўнг британиялик таниқли журналист Пирс Морган кескин ва кинояли чиқиш билан муносабат билдирди. У Буюк Британия АҚШни “қайтариб сотиб олиши” кераклигини таклиф қилди. Бу ҳақда риа новости нашри хабар берди.
Морган ушбу фикрини Х (собиқ Twitter) ижтимоий тармоғидаги саҳифасида эълон қилар экан, Трампнинг Гренландияни миллий хавфсизлик нуқтаи назаридан сотиб олиш режалари мантиқсиз эканини масхара қилди. Журналистнинг ёзишича, агар АҚШ Гренландияни сотиб олмоқчи бўлса, Буюк Британия ҳам АҚШни сотиб олишга ҳақли.
“Агар сиз уни бизга сотмасангиз, президент Трамп, биз Қўшма Штатларга ва бу фойдали келишувга қарши чиққан ҳар қандай давлатга тарифлар жорий қиламиз. Тўғрими?” — дея киноя қилди Морган.
Унинг таъкидлашича, АҚШнинг Буюк Британияга қўшилиши Шимолий Атлантика хавфсизлигини янада мустаҳкамлаши мумкин. “Ахир, у бир вақтлар бизники эди”, — дея қўшимча қилди журналист.
Аввалроқ "The Economist" нашри Трампнинг Гренландия бўйича позициясига таъсир этувчи омиллар ҳақида ёзиб, АҚШнинг айрим ҳарбий ва геосиёсий операциялари Британия инфратузилмасига боғлиқ эканини қайд этган эди.
Маълумот учун, Гренландия Дания қироллиги таркибига киради. АҚШ президенти Дональд Трамп эса орол Қўшма Штатлар назоратига ўтиши кераклигини бир неча бор таъкидлаган. Дания ва Гренландия расмийлари бу баёнотларга кескин муносабат билдириб, ҳудудий яхлитлик масаласи муҳокама қилинмаслигини маълум қилган