Ҳиндистонда самолёт двигатели учиш пайтида ёниб кетди
Ҳодиса ортидан 232 йўловчи фавқулодда тарзда эвакуация қилиниб, олти нафар йўловчи турли тан жароҳатлари олган.
Ҳиндистон пойтахти Нью-Деҳли шаҳридаги Индира Ганди халқаро аэропортида Swiss International Air Lines авиакомпаниясига тегишли самолётнинг двигатели учиш вақтида ёниб кетди.
Times of India маълум қилишича, LX147 рейси Нью-Деҳлидан Цюрих шаҳрига парвоз қилиши керак бўлган. Учиш жараёнида Airbus A330 русумли ҳаво кемасининг двигательларидан бирида носозлик юзага келиб, ёнғин содир бўлган.
Ҳодиса ортидан бортдаги 232 нафар йўловчи, жумладан, тўрт нафар чақалоқ фавқулодда қутқарув слайдлари орқали эвакуация қилинган.
Дастлабки маълумотларга кўра, олти нафар йўловчи турли жароҳатлар билан шифохонага ётқизилган. Экипаж аъзолари орасида жабрланганлар йўқ.
Swiss International Air Lines ҳодиса юзасидан махсус текширув гуруҳи тузилганини маълум қилган. Шунингдек, компания техник мутахассислари самолётни кўздан кечириш ва кейинги чораларни белгилаш учун Деҳлига юборилиши билдирилган.
