Эрон АҚШга урушни тугатиш бўйича таклиф юборди — Axios
Оқ уй мазкур таклифни олган, бироқ Вашингтон уни қачон кўриб чиқиши маълум эмас.
Эрон АҚШга Ҳормуз бўғозини очиш ва урушни тўхтатишни назарда тутувчи таклиф юборди. Бу ҳақда Axios нашри манбаларга таяниб хабар берди.
Маълум қилинишича, янги таклиф Эрон ташқи ишлар вазири Аббос Ароқчи томонидан ўтган дам олиш кунлари (25–26 апрель) Исломободда ўтказилган музокаралар чоғида Покистон воситачилари орқали АҚШга етказилган. Унга кўра, ўт очишни тўхтатиш узоқ муддатга узайтирилиши ёки томонлар урушни бутунлай якунлаш бўйича келишувга эришиши мумкин.
Таклифга мувофиқ, Эрон ядро дастури бўйича музокаралар Ҳормуз бўғози очилиб, Эрон портларига қўйилган блокада бекор қилингандан кейин бошланиши мумкин.
Оқ уй мазкур таклифни олгани айтилмоқда, бироқ Вашингтон уни кўриб чиқишга тайёрми ёки йўқми — ҳозирча номаълум.
Axios қайд этишича, блокаданинг бекор қилиниши ва урушнинг тугатилиши АҚШнинг Эрон ядро дастурига таъсир ўтказиш имкониятларини чеклаши мумкин.
27 апрель куни АҚШ президенти Доналд Трамп музокаралардаги вазият ва кейинги эҳтимолий қадамларни ўз жамоаси билан муҳокама қилиши кутилмоқда.
Аввалроқ, 24 апрель куни Трамп ўз вакиллари — Стив Уиткофф ва Жаред Кушнерни Исломободга музокаралар учун юбормоқчи бўлганини, бироқ кейинчалик уларнинг сафарини бекор қилганини маълум қилган. Трамп Axios нашрига Эроннинг позицияси уни ушбу сафарни бекор қилишга ундаганини айтди.
Эслатиб ўтамиз, Яқин Шарқдаги можаро бошланганидан буён Ҳормуз бўғози ёпилган, АҚШ эса Эрон портларига нисбатан денгиз блокадасини жорий этган.
