Виктор Орбан Венгрия парламентини тарк этди
У парламент фаолиятидан кўра миллий ҳаракатларни тиклаш муҳимлигини таъкидлади.
Венгрия бош вазири Виктор Орбан парламент сайловларида ҳукмрон коалиция мағлубиятга учраганидан сўнг парламентдаги депутатлик мандатидан воз кечганини маълум қилди. Бу ҳақда DW нашри хабар берди.
Сиёсатчи 25 апрель куни ижтимоий тармоқлардаги саҳифаларида эълон қилган баёнотида, Fidesz–Христиан-демократик халқ партияси коалицияси етакчи номзоди сифатида олган мандати амалда партияга тегишли эканини билдириб, ундан воз кечишга қарор қилганини қайд этган.
Орбан ўз баёнотида айни пайтда парламент фаолиятидан кўра, миллий ҳаракатни қайта ташкил этиш муҳимроқ эканини таъкидлаган.
Шунингдек, унинг маълум қилишича, аввал Бош вазир девонига раҳбарлик қилган Гергели Гуляш эндиликда парламентдаги Fidesz/KDNP фракциясига раҳбарлик қилади.
Виктор Орбан Fidesz партияси раиси сифатида фаолиятини давом эттиришга тайёрлигини билдирган. Мазкур масала июнь ойида бўлиб ўтадиган партия қурултойида кўриб чиқилади.
Венгрияда бўлиб ўтган парламент сайловларида ғалаба қозонган Tisza партияси етакчиси Петер Мадьяр 9 май куни бош вазир лавозимини эгаллаши кутилмоқда.
