Энди чиқиндидан қарзи борлар электрга тўлов қилолмайди
Бу бўйича чеклов амалга киритилмоқда.
“Ҳудудий электр тармоқлари” чиқинди учун пул тўламаган истеъмолчиларга оммавий равишда СМС юбора бошлади. Огоҳлантиришдан кейин ҳам тўловларни амалга оширмаганларнинг электр учун тўловларини қабул қилиш чеклаб қўйилади.
Қайд этилишича, “Чиқиндиларни бошқариш тизимини такомиллаштириш ва уларнинг экологик вазиятга салбий таъсирини камайтириш бўйича чора-тадбирлар тўғрисида”ги президент фармонида чиқинди хизматлари учун ойлик тўловлардан қарздорлиги бўлган абонентларни СМС орқали хабардор қилиб бориш амалиёти белгиланган.
Шунингдек, фармонда чиқинди қарздорлиги бўйича огоҳлантирилгандан кейин ҳам тўлов қилмаган шахсларнинг электр учун тўловларини қабул қилишни вақтинчалик чеклаш амалиётини жорий этиш ҳам кўзда тутилган.
Мазкур фармон ижросини таъминлаш мақсадида жорий йилнинг октябрь ойидан бошлаб “Ҳудудий электр тармоқлари” АЖнинг 2100 қисқа рақами орқали огоҳлантириш хабарларини юбориш амалиёти йўлга қўйилди.
Айни пайтда “Ҳудудий электр тармоқлари” АЖ томонидан чиқинди бўйича огоҳлантириш хабари юборилгандан сўнг, қарздорликни бартараф этмаган истеъмолчиларга электр энергияси учун тўловларда чекловлар киритиш бўйича ҳам техник ишлар олиб борилмоқда.
