Энди Ўзбекистонда АИ-98 маркали бензин ҳам ишлаб чиқарилади
Бухоро нефтни қайта ишлаш заводида АИ–98 юқори сифатли этелланмаган бензин ишлаб чиқариш йўлга қўйилди. Бу ҳақда “Ўзбекнефтгаз” АЖ хабар берди.
Унда келтирилишича, мазкур ютуқ маҳаллий мутахассисларнинг изланиши натижаси бўлиб, хорижлик мутахассислар билан ҳамкорлик қилинмаган.
АИ–98 автомобил бензинининг дастлабки партияси ишлаб чиқарилиб, физик-кимёвий хусусиятлари стандартга биноан муваффақиятли синовдан ўтказилган. Ҳозирда завод ушбу маҳсулотни серияли ишлаб чиқариш учун ЎзДСт 3031:2015 “Автомобил бензинлари. Техник шартлар” сертификати билан ишлаш жараёнини давом эттирмоқда.
Бензиннинг бу тури, асосан, сиқиш даражаси 12 дан 14 гача бўлган двигателли автомобилларда ишлатилади. АИ–98 бензини юқори детонасияга қарши хусусият (октан характеристика)лари туфайли двигател қувватини оширади. Шунингдек, тезланиш динамикасини яхшилайди, тебраниш, шовқин даражасини пасайтириб, ёнилғи сарфини сезиларли даражада камайтиради.
Маълумот ўрнида: Бугунги кунда Бухоро нефтни қайта ишлаш заводида 19 дан ортиқ маркага эга бўлган 9 та турдаги маҳсулот ишлаб чиқарилади.
Эслатиб ўтамиз, аввалроқ Ўзбекистонда бензин нархи йил бошидан буён 17 фоизга қимматлашгани ҳамда энг кўп бензин қайси ҳудудда ишлаб чиқарилгани ҳақида хабар берилганди.
Оламгир Абдиев
