Унга кўра, бўлажак институтда таълим фаолияти 2021/2022 ўқув йилидан бошлаб йўлга қўйилади. Ўқиш давлат гранти ҳамда тўлов-контракт асосида амалга оширилади. Шунингдек, 2022/2023 ўқув йилидан бошлаб, бакалавриатда 2 та янги, жумладан, бастакорлик санъати ва санъатшунослик: мусиқашунослик таълим йўналишлари очилиши таъкидланган. Бунда ташқари, магистратурада 2 та янги мутахассислик - овоз режиссёрлиги: мусиқий овоз режиссёрлиги ҳамда мусиқа санъати йўналишлари ташкил этилади.
Айни кунларда институтнинг асосий вазифалари белгиланмоқда. Жумладан, юқори малакали мутахассислар ва илмий-педагог кадрларни тайёрлаш, миллий эстрада йўналишида замонавий ижро намуналарининг “Олтин фонди”ни яратиш ҳамда уларни нотага кўчириш ва амалиётга кенг жорий этиш кабилар шулар сирасига киради. Бунга қўшимча тарзда, миллий эстрада йўналиши бўйича фундаментал, амалий ва ижодий изланиш ҳамда тадқиқотлар олиб бориш ҳам йўлга қўйилиши ҳам режада бор.
2022/2023 ўқув йилидан бошлаб болалар мусиқа ва санъат мактаблари (324 та), ихтисослаштирилган санъат ва маданият мактаблари (17 та), мактаб-интернатлар (8 та) ҳамда маданият, мусиқа ва санъат коллежларида (2 та) “Маҳорат дарслари” йўлга қўйилади. Уларга институтнинг етакчи профессор-ўқитувчилари ҳамда мамлакатимизда ижод қилиб келаётган таниқли эстрада ижодкорлари бириктирилади.
Аввалроқ Бутунроссия давлат кинематография институтининг Ўзбекистондаги филиали ҳамда Тошкентда Марказий Осиё халқаро институти очилгани ҳақида хабар берилганди.
Оламгир Абдиев