Фарғонада 60 ёшли эркак алкоголдан заҳарланиб, вафот этди
Ижтимоий тармоқда уни ИИБ ходими калтаклагани айтилмоқда.
Ижтимоий тармоқларда Қувасой шаҳар Лашкар қишлоғида ИИБ участка инспектори бир фуқарони уриб жароҳат етказгани ҳақида хабар тарқалган. Ҳолат юзасидан Фарғона вилоят прокуратураси расмий баёнот эълон қилди.
27 август куни соат 19:00 ларда Қувасой шаҳар “Юқори Мўян” МФЙ ҳудудида 1962 йилда туғилган фуқаро Х. Т. жамоат тартибини бузувчи ҳаракатлар содир этган. Шундан сўнг Қувасой шаҳар ИИБ ходимлари томонидан мастлик ҳолатини текшириш мақсадида шаҳар тиббиёт бирлашмасига олиб кетилаётган вақтда уни соғлиғи ёмонлашиб, кўрсатилган тиббий ёрдамга қарамасдан вафот этган.
Судга оид тиббий экспертизанинг дастлабки маълумотига кўра, Х. Т.нинг ўлимига “Юракнинг ишемик касаллиги, юрак тож кон томирларини ўткир етишмовчилиги, ўнг томонлама пневмония, сурункали плеврит, ошқозоности безига қон қуйилиши, алкоголдан заҳарланиш” ташхиси қўйилган.
Ҳозирда мазкур ҳолат юзасидан Қувасой шаҳар прокуратураси томонидан терговга қадар текширув олиб борилмоқда. Текширув жараёни вилоят прокуратураси томонидан назоратга олинган.
